تحــــــذير:خــــــدى بـــــــالك من اول سطر فى الزواج

الانسان بيغلط والاهم انه يعترف بغلطه

ويقدم النصيحه المفيده لغيره

هنعلم على اهم نقطه من مرحله الخطوبه

اللى هيه1) الاختيــــــــــــار لازم يكون اختيارك سليم" لزوجك"...

"ابو ولادكـــ "100 % لان ده هيعود عليكى بعد الزواج بااذن الله

2)اياكى!! تختارى الشخص للمظاهر لانها زى الفالصو مش بتعيش معاكى !

زى وحده يجيلها عريس وتقولك ده عنده عربيه بى ام دابليوخطييييره!!!


وانتى هتعملى ايه بالعربيه هتتجوزيها ؟ولا هتتجوز

الشخص نفسه؟

افرضى العربيه النهارده موجوده بكره لاء ..مين اللى هيدوملك ؟

وكذلك اللى تختار للشقه الفارهه ولا علشان بيشتغل فى شركه كذا او عنده شركه

او شكله فى غايه الوسامه ولا هيجبلها شبكه سوليتير

(الرزق من عند ربنا مقسم الارزاق)

اللى ممكن اللى معاه النهارده مش معاه بكره والعكس

3)واوعى! تبصى لصحبتك لان البنات دلوقتى غالبا بيهجسو كتير فى كلامهم

يعنى متجيش صحبتك تقولك خطيبى ولا جوزى جابلى خاتم تمنه 10 تلاف جنيـــــه!!!

وانتى تروحى ماسكه الغلبان اللى معاكى وتطلعى عينه علشان مجبلكيش زيه

... ده بقى قمه السذاجه متزعليش منى ولا انتى تهجسى زيهم خليكى معقوله !

4)وبعدين كل واحد على اد امكانياته يعنى خليكى على اده وقنوعه

"مدام هوه شريكى" لانها نقطه مهمه اوى

مره قريت لبنوته عاوزه تسيب خطيبها علشان بخيل


قال ايـــــــــه! مش عاوز يغيرلها حنفيه الحمام شكلها

وحش

ويقولها خليها بعد الجواز هعملك اللى انتى عاوزاه بس انا مش عاوز اتجوز

وانا مديون انا بصراحه استغربت منها على التمرد بتعها والطمع

تمام كده ..

اهم شىء بردو نأكد عليه ايام الخطوبه واول سنه فى الجواز

5) الاســـــــــــــــــرار انك متبقيش خالتى بامبه راديو مفتوح كل ماتشوفى وحده تعرفيها

تحكيلها عن اسرارك واسرار اهله واهلك واللى حصل امبارح وانتى بتكلميه و . و . و

ده اكبر غـــلــــــط اولا لمثل بسيط (دارى على شمعتك تقيد ) علشان ربنا ييسرلك امورك


استنى متقفليش الموضوع كمليه للاخر


ممكن اخر نقطه فيه تكون مهمه ليكى اوى


نيجى بقى لبعد الجواز


****خدى بالك علشان فى بنات قالو ان الكلام ده كله على الفاضى


ويقولو فى رجاله كتير بتتغير بعد الجواز وبيبهدلو الست وبيبقو فى قمه قله الادب


****هقولك.. انتى لو مشيتى على الكلام ده.. عن "تجارب" هتعرفى تختارى صح

الانسان اللى هيكمل معاكى حياتك..

فى ناس كتير بتكتشف عيوب كبيره ايام الخطوبه وتعديها بااسم

(عريس احسن من قعدتى )

لا غلط وعن تجربه اوعى تمشى بالكلمه دى والله والله لو رزقك فى اخر الكون مكتوبلك

هتاخديه محدش غيرك هياخده

نيجى6) لعاده سيئـــــه جـــــــدا وحرام شرعا للعروسه الجديده

انها من بعد مايتقفل عليها بيتها مع جوزها

تانى يوم تعد تحكى لكل البنات اللى حصل فى اوضه نومها


على فكره لاقيت الحكايه دى الدين "محرمها "بيقولك حتى والدتك او اختك

متعرفش اللى حصل جوه اوضه نومك


7)وبعدين خدى بالك! الرجاله مش زى بعضها مش اللى عملته وحده وجوزها


حب كده انتى تطبقيه على زوجك


8)اهم شىء اول ماتكونى مع جوزك من اول ليله


تعرفى وتفهمى منه ايه اللى بيحبه

وايه اللى بيكرهه وده من الدين علشان تتجنبى المشاكل **هقولك ليه

اكبر نسبه طلاق حاليا بتكون فى السنه الاولى والتانيه من الجواز

ليه؟؟ علشان مهما كانت فتره الخطوبه همه بردو لسه معرفوش بعض

فبعد الجواز بيبدأو يعرفو داخليات بعض ويخبطو فى بعض

فاانتى علشان تحتوى بيتك صح وتكملى صح وتتجنبى كتر المشاكل يبقى تعرفى منه كل حاجه عنه وتحتويه

وتحاولى تتنازلى شويه علشان فى بنات تقولك لالالالاااا لاااازم يسمع كلامى

من اولها زى مابيقولك (ادبحيله القطه من اولها )

(او انتفى ريشه)

لا غلط اوعى! مافيش راجل محترم يقبل على نفسه كده

وهيحصل مشاكل كتير ..

بعد ماانتى هتعرفيه وهتحتويه هوه كمان هيعرفك وهيحتويكى


وهيفهمك ويقدرك كزوجه ام ولاده وان فى مسؤليه خلاص بقت عليه

والامور بعدها هتمشى بااذن الله احلى واحلى

9)متبقيش مبذره القرش الزياده ده انتى اولى بيه حوشيه فى حصاله

للطوارىء والمناسبات مدام هيتصرف فى حاجه بغنى عنها

يعنى لما تسهرو فى مكان صغير شيك احسن من مكان مبالغ فيه .انتو لسه فى

اول طريقكم انا مدام مع جوزى حبيبى فى اصغر مكان حتى لو بيتى هيبقى عندى جنه


10)اياكى اياكى اياكى! ودى بأكد عليها مليــــــــــــون مره


ان مع اول مشكله تجرى تحكيها لاهلك واهله ايــــــــــــاكى


ولا حتى من بعد مليون مشكله . هيتعود على كده وانتى كمان

والبيت هيتخرب وهتعملى عداوه بين الطرفين متنسيش اننا قولنا انكم لسه بتخبطو فى بعض

ولما النار هتهدها اللى حوليكم مش هينسو اللى حصل وهيشيلو لبعض

11)واذا اذااااا حصل! ونادرا اذا حد من اهله غلط معاكى خليكى انتى الاحسن منهم

واوعى تردى عليهم زيهم خليكى الافضل دايما بالحسنى والمعروف

مثال=< لو والدته لان غالبا البنات بتاخد الحمى انها عدوه

وسعات الحمى تاخد زوجه الابن عدوه

اولا=< انتى لازم تصفى اللى جواكى من النقطه دى !لان فى الاول والاخر

دى ست كبيره وامه وعمره ماهيجى عليها علشانك دى امه مهما عملتى !!

ولو كسبتيها فى صفك يبقى كسبتى اكبر خطوه علشان كمان هوه نفسه

يعامل اهلك كويس ويحترمهم وربنا يرضى عنك

اما الحمى سعات بتكون كده دى شىء طبيعى بالذات لو كان ابنها الوحيد

لانها بيكون جواها زى غيره لذيذه انها بعد ماربت وتعبت ودلعت

جت وحده تانيه شاركته في ابنها بل كمان اخدته منها من حضنها

انتى وشطارتك تكسبى الجوله دى وترضيها وتكسبيها

بس بلباقه وبااحترام (بمعنى انك مش تزللى نفسك )

وكلامك فى الحديث مع اهله بالمعقول يعنى متبقيش لكاكه ولا حشريه

ولا تجيبى سيره حد بالوحش حتى لو انتى مش بتحبيه

وبتسمعى وتفهمى اكتر مابتتكلمى

12)واهم شىء النضافه الشخصيه مش بس من برا من مظهرك


لا ده كمان من جوه يعنى تصفى نيتك اذا حد غلط معاكى قدامه

مش تجرى وتردى وتعلى صوتك لالالا خليكى رقيقه وشيك ولبقه

كفايه انك تتجاهلى الانسان ده وتسيبى جوزك هوه يتصرف

لانهم غالبا بيحبو النقطه دى انه يحس انه بطل هيرو كده

بس مش معنى كده انك تجبيله المشاكل من هب ودب!

ده احنا بنقول فى الامور الكبيره

واتعلمى دايما انك متعامليش اللى قدامك بالسىء

زى ماهوه عاملك بل بالعكس عامليه بالافضل والاحترام

لان دى الشوكه اللى هتكسر اللى قدامك..

وبيتك ده يبقى نضيف ومرتب عالطول كاانه حته من الجنه

13)تمشى معاه متبصيش لاى راجل وتهزرى وتضحكى وتسبلى!!! .....

(انا مش بعمم لان عارفه ان فى بنات بسم الله ماشاء الله عليهم انا بعلم على بنات معينه ربنا يهديهم)



لانى شوفت بنات متجوزه ومخطوبه كده وبصراحه انا قرفت من

منظرهم تدخل محل معاه وهات يااهزار مع الراجل اللى بيبيع!! او لو قاعده فى كافيه تعد عنيها

تلف فى كل الجهات او لو راكبه مواصلات او . او... بحس ان عندهم نقص بصراحه ..

متخفيش انتى اموره وموزه بس فى عين جوزك بس

تحطى جواكى كده انا بحمى نفسى من فتن الدنيا

بس جوه بيتى قدام جوزى احلى وحده فى الدنيا

لان انا جوهره غاليه ملك جوزى بس....

وبرضى ربنا قبل جوزى علشان يرضو عنى

14)ونقطه بلاحظها كمان الغيــــره الزياده

يعنى مش وانتى معاه اى وحده تبصلكم تبقى بتبصبص

للمحروس او تعرفه وتطلعى عقدك على الراجل عاوزه اطمنك..

خليكى واثقه من نفسك والراجل لما بيخبط على باب وحده من مليون وحده

وبيختارها هيه بتكون دى الوحيده اللى ملت عنيه وبيحبها

..النقطه دى خدى بالك بيكرهها الراجل ..!

15)اذا حصل مشكله من طرف اهلك حتى لو قريبتك من

بعيد تحاولى تهدى وتفكرى الاول كويس وتحليها بهدوء ومتتكلميش كتير

مش تجرى عليه تشتكى وهات يارغى لا غلط على الاقل


متطلعيش عيوب قرايبك كده من اولها

وكمان علشان هوه ميمسكش غلط او عيبه على حد او يكره

حد اتكلمى على غيرك بااجمل صفاته علشان ربنا

16)تستقبلى جوزك بااحلى حاجه منك وعندك مش منكوشه وريحتك بصل وهدومك مش مهندمه

ومش تجرى تنطى عليه زى العيال واحضان وهوه ياعينى راجع جسمه تعبان ومتكسر وباله مش رايق ..!

_وكمان طلباتك ليكى ولبيتك تكتبيها كلها فى ورقه

كل اربع ايام او اسبوع اظن مش هتحتاجى اقل من كده

وتديهاله تقوليله اتفضل حبيبى ..

مش كل يوم عاوزه كذا وكذا وكذا ومتنساش كذا وكذا

يعنى لما يكلمك فى التليفون عاوزه حاجه حبيبتى وانا جاى تقوليله

لا حبيبى عاوزه سلامتك انا جبت اللى محتجاه من السوبر ماركت من

مصروف البيت متحرمش منك يارب متتاخرش عليه حبيبى مستنياك.. ! هتلاقيه جاى طااااااير عليكى


17)حاولى لو راجع مهموم مش من اول مايدخل مالك فى ايه هه هه قولى

رد مش بترد ليه وتفضلى تزنى علشان عارفه العاده المنيله دى تحاولى

تسبيه لحد مايهدى وتكلميه براحه فى وقت صفا حتى لو بعد اسبوع مالك حبيبى كان ايه مزعلك..!!

18)عودى جوزك على حسن الكلام ومخارج الالفاظ لانك هتبقى ام ومربيه

يعنى مثال لو نادى عليكى تقوليلو نعم (واسم الدلع او حبيبى )

مش ايه ولا عاوز ايـــــــه.!

خليكى راقيه فى اسلوبك وكلامك

(ابنك على متربيه وجوزك على متعوديه)
19)

وكمان وقت الصفا بينكم فى اوضه نومك! تجنبى الكلام عن المشاكل

لان ده بتأثر على العلاقه الجنسيه بينكم..!! وكمان تعوديه ان فى

اوضه النوم مش للكلام فى المشاكل والهموم لانها اسمها اوضه

نـــــوم لوقت الصفا والراحه بس.. واذا لقدر الله حصلت مشكله


بينكم وهوه اتعصب تسبيه خاااااااااااااالص اوعى تردى عليه وتعصبيه


اكتر لحد مايهدى وبعدها لما يروق خالص تبدأى تكلميه وتفتحى




الموضوع بسياسه . هتلاقيه ايه طفل صغير معاكى

20) مش اى جاره ليكى او وحده تاخديها حبيبتك وتطمنى ليها بسرعه .!!


21)وحاولى ! تكونى داخله بيتك شاطره من كل حاجه

بالذات اكلك لان عارفه بنات كتير يقلولك يااختى بكره نتعلم

لا يااختى ايوه بكره تتعلمى بس هيجى وقت فى اول جوازك

غصب عنك هتعزمى وتتعزمى وايــــــه بقى لو اكلك !! كله هيفضل فاكرهالك وكمان علشان تكونى

متعوده مش بس على جمال طعم الاكل لاء شياكه وفن وسرعه تقديم

الاكل كمان !.لاحسن الراجل يجرى على مامته

لان كمان اكتر الرجاله بتحب الاكل هنا فى مصر

حاولى تدى اول انطباع

عنك تكون حلوه من كل حاجه وتكونى عندك كرم الضايفه

22)تهتمى بنضافه وشياكه جوزك

23) والاهم من كل اللى فات انكم انتو الاتنين تتعودو

مع بعض على طاعه الله يعنى ياسلام لو كل يوم الفجر

تتعودو تصلوه مع بعض وتقرو القرءان

فى ملحوظه صغيره : اولها تاخدى بالك فى اول الزواج

من وزنك علشان اكتر البنات بتتخن وده غلط لسببين لانه بيكون عامل من عوامل تأخير الحمل

ودى عرفتها من دكتوره وتانى حاجه انك داخله على مرحله حمل وولاده تعملى حساب كده

تانى حاجه اكل الفاكهه مفيد ليكى وليه فى الفتره دى

دى بردو عرفتها من دكتوره

تالت حاجه الوقت الفاضى لان اكترهم بيشتكو من كده


عندك حلول كتير للوقت الفاضى عندك

(تقرى كتب & تتعلمى شغل يدوى يفيدك تريكو- رسم- الخ

..& ممكن تشتركى فى اى مجال عائد دخلى ليكى..وحجات كتير ) بس بشرط متهمليش بيتك !!!


****خدى بالك الكلام ده كله عائد عليكى ولمصحلتك بعد


كده زى اللى بيزرع زرعه ويفضل يراعيها وطول مابتكبر بيحصد منها الخير وبتطرح خير

ده انتى ليكى الجنه من اوسع ابوابها ورضا ربنا

اوعى تفكرى ان بعد ماتفتحتى بيت انك سهل يتهدم


لالالا غلطانه وهقولها لكل بنت مع اول المشاكل تجرى


وتقول عاوزه اطلق . انتى مغفله 100%

لو معاكى انسان كويس والمشاكل تتحل حافظى عليه وعلى بيتك

بالذات لو معاكى اطفال لانك اول وحده بتضرى من الطلاق

وهترجعى تندمى والله

الطلاق ده فى الضروره بس يعنى خلاص بقى

لما كل الحلول تفشل

واخيرا أسفه لطول الموضوع حبيت اوضح كل كبيره وصغيره اتعلمتها فى حيااتى

وانا أسفه كمان مره لو كنت قصرت فى اى شىء

ويقولو فى رجاله كتير بتتغير بعد الجواز وبيبهدلو الست وبيبقو فى قمه قله الادب

احسنتي في معالجه هذه الفكرة اللعينه

مرسي علي مرورك يا ريت تبقا تكتب اسمك عشان نتشرف بيك

نصايح حلوة اوى وانا كنت ناويه اعمل كل حاجه قولتيها فى الموضوع ده بعد الجواز
بس فى حاجه مش هعرف اعملها
انى مبذرة جدا مش بعرف احوش اى فلوس
حاولت كتير بس فشلت قصدى لسه مش نجحت هههههه

تسلمى سندس